DAVAO CITY – Gilauman sa mga magpapatigayon nga mabati na ang maayong resulta sa sisterhood agreement tali sa dakbayan sa Davao ug sa Kaua’i County sa Hawaii, sa Estados Unidos nga gilagda-an niining milabay nga semana tali ni Mayor Inday Sara Duterte-Carpio ug ni Mayor Bernard Carvalho Jr.
Sumala pa kang Arturo Millan, Presidente sa Davao City Chamber of Commerce and Industry dakung kahigayonan ang kasabotan labi na sa natad sa agrikultura ug turismo.
Dugang pa ni Millan nga daku ang ilang paglaum nga gumikan sa sisterhood agreement, daghanan nga ihap sa mga langyaw nga mga mamumuhonan ang mosulod sa dakbayan aron nga mangita ug kahigayonan sa pamuhonan.
Niadtong Lunes gilagda-an ang memorandum of agreement ni Mayor Duterte-Carpio ug Mayor Carvalho, Jr. tumong niini ang trade exchange sulod sa lima ka mga katuigan.
Samtang sumala pa kang Lemuel Ortonio, head sa Davao City Investment and Promotion Center (DCIPC) nga abli na karon ang kutay sa pamatigayon tali sa dakbayan sa Davao ug country sa Kaua’i, Hawaii, sa Estados Unidos.
