DAVAO CITY – Nagkataas pa ang ihap sa mga natakdan sa mas makatakod nga delta variant sa Davao region kini human nga natala karon sa ahensiya sa Department of Health (DOH)-Davao Region ang dugang 15 ka mga pasyente nga gilangkuban sa 11 ka mga local cases ug upat ka mga returning overseas Filipinos (ROFs).
Hinungdan nga mikabat na sa 28 ang mga natalang natakdan sa balatian.
Kahinumduman nga sa gipagula nga report sa DOH-Davao, kalakip ang 11 ka mga local Delta cases sa 169 specimens sa rehiyon nga gisumite sa Whole Genome Sequencing (WGS) sa milabay nga Hulyo 29 ug August 25.
Sa nahisgutan nga ihap sa delta cases, 10 niini ang Davao City; Davao del Norte, 1; ug Davao Oriental, 4. Tungod niini gikatakda na ang repeat reverse transcription polymerase chain reaction (RT-PCR) test.
Wala sab gi-specify sa ahensiya kung ang bag-ong delta cases ang active o recovered.
Gawas sa bakuna, gikanayon sa DOH-Davao nga walay bisan unsa man nga strategy aron nga batukan ang pandemiya sa kasamtangan kung dili mao ang pagtuman sa minimum public health standards sama sa paghugas sa kamut, pagsuot ug face mask ug face shield ingon man social distancing.
Kahinumduman nga epicenter karon ang dakbayan sa Davao sa Mindanao human nga nakatala ug taas nga kaso sa covid-19.
