DAVAO CITY – Naghulat na lamang si Irene Matinag, usa sa mga renters sa Bankerohan ning dakbayan kung unsa ang ihatag nga hinabang kanila.
Sumala pa kang Irene, lumad nga taga Bangaga Davao Oriental, nga nangarkila lamang siya sa Bankerohan sanglit nanarbaho siya dinhi sa dakbayan sa Davao.
Anaa sumala pa siya sa iyang duty dihang miulbo ang sunog ug dihang nadungog nga nanukad kini sa Bankerohan, gilayon siya nga nananghid sa iyang head.
Apan ulahi na ang tanan dihang nakita ni Irene nga gilamoy na ang mga pinuy-anan sa lugar kalakip na ang iyang gi-arkilan nga boarding house hinungdan nga wala siyay nakuha nga bisan usa ka butang.
Wala pa sab nasayod si Irene kung asa siya temporaryo nga matulog sanglit bag-ohay lamang siya dinhi sa siyudad.
