DAVAO CITY – Gitun-an na karon sa City Legal Office ang pagduso ug kaso batok ngadto sa demolition contractor sa New City Commercial Center (NCCC) mall kinsa nasayran nga wala pagtugot nga mamaligya sa mga damage products.
Kahinumduman ng hugtanon nga gi-dili ni Davao City Mayor Inday Sara Duterte-Carpio ang pagpamaligya sa mga grocery items nga salin sa sunog nga mga produkto sa New City Commercial Center (NCCC).
Na-alarma ang mayor sa dihang nasayran nga gibaligya sa mga sakop sa demolition contractor ang mga produkto nga salin sa sunog nga angay na unta nga gipanglabay o kaha gipanglubong na.
Sumala ni Mayor Inday nga seguro nga dunay dala nga kadaut sa panglawas ang nahisgutan nga mga produkto.
Nasayran nga gisugdan na ang pagpanglubong sa nahisgutan nga mga produkto sa sulod sa tree park sa Barangay Taconan, Tugbok District ning dakbayan.
Subay kini sa kamandu-an sa City Health Office nga angay nga maseguro sa Barangay nga wala na’y magagmit pa sa mga nangadaut nga mga produkto.
Una nang gitataw sa NCCC pinaagi sa public relations manager niini nga si Thea Padua nga wala sila’y gitugtan nga mamaligya sa mga salin sa sunog sa NCCC.
