Gipasabot sa Department of Justice (DOJ) nga wala pa’y kumpirmasyon ang ilang ahensya kung tinuod ba nga mga bukog sa tawo ang narekober sa daplin sa Taal Lake.
Sumala ni Justice Assistant Secretary ug Tigpamaba nga si Mico Clavano, posible nga dili bukog sa tawo ang sulod sa mga sako nga nakaplagan ug narekober sa Philippine National Police (PNP) ug Philippine Coast Guard (PCG).
Gihimo kini human gilusad sa DOJ ang search and retrieval operations sa Taal Lake aron pagpangita sa giingong mga lawas sa nawagtang nga mga sabungero.
Dugang pa ni Clavano, ginapugngan sa DOJ ang pagpataas sa kasaypanan o “expectation” sa publiko tungod kay dili pa klaro kung unsay sulod gayud sa mga narekober nga sako.
Apan, naglaum gihapon ang DOJ nga ginabuhat sa Philippine Coast Guard ang tanang paagi aron mas mapalambo ang ilang operasyon nga may kalabotan sa kaso sa mga nawagtang nga mga bungero.
Kahinumduman nga nagsugod ang pagsalom sa daplin sa Taal Lake human mibutyag ang usa ka testigo nga didto kuno gilabog ang mga nawagtang nga sabungero.
Partikular nga si alyas ‘Totoy’ o Julie ‘Dondon’ Patidongan, mibutyag siya bag-ohay lamang nga ang mga biktima gipaunlod kuno sa maong lugar o sa lawa.
Tungod niini, gibutyag ni Justice Spokesperson Mico Clavano nga ang mga narekober nga sako sa Taal Lake ipailawom sa forensic examination o pagsusi.
Gipadala na usab sa DOJ ang mga sakop sa National Bureau of Investigation (NBI) ug mga piskal aron mahimong mga saksi sa maong search and retrieval operation.
Samtang wala pa’y pinal nga kumpirmasyon kung bukog ba gayud sa tawo ang sulod sa mga sako, diin gibutyag ni Clavano nga posible nga molungtad pa og usa hangtod duha ka adlaw ang forensic examination aron kini matino .
