DAVAO CITY – Gi-anunsyo sa Department of Health XI, sa pakig-alayon sa City Government of Davao, nga magpahigayon sila og pagpabakuna batok COVID-19 alang sa mga wala nakaadto sa ilang scheduled 2nd Dose sa AstraZeneca vaccine gikan Marso hangtod Hulyo 15 ning kasamtangang tuig.
Ipahigayon kini sugod karong adlawa hangtod ugma, Setyembre 28 sa USEP Gymnasium sa Barrio Obrero ning Dakbayan.
Mulungtad usab gikan alas 8 sa buntag hangtod alas 2 sa hapon ang ilang pagdawat sa mga buot magpabakuna.
Gipahimangnuan usab ang mga adunay missed dose sa AstraZeneca nga dal-on ang ilang vaccination card ug valid ID.
Ang pag-akomodar usab sa mga dunay missed dose, pamaagi sa lokal nga panggamhanan nga mapapaspas ang vaccine rollout ug ang pagkab-ot sa herd immunity.
Sa ulahing ihap sa Davao City Vaccination Cluster, anaa sa lapas 700,000 ang naka-first dose na samtang dul-an 537,000 na ang matawag nga fully-vaccinated batok COVID-19.
Tumong sa lokal nga panggamhanan nga makab-ot ang 1.2 million nga target vaccinated population sa bulan sa Nobyembre ning kasamtangang tuig.
