DAVAO CITY – Mikabat na sa 14 ang gikatalang nagpositbo sa Covid-19 sa St. Francis of Asisi Parish, Ma-a, ning syudad.
Kini subay sa gipahigayon nga contract tracing sa nasampit nga simbahan diin sa nahisgutang ihap nadungagan kini og 3 ka madre ug tulo pa ka mga staff ang gikatalang nag positibo sa maong kaso.
Kahinumdoman nga una ng gikaingon nga adunay 3 ka pari ug usa ka semanarista ang nagpositibo sa Covid-19 hinungdan nga nagpadayon gihapon ang contract tracing sa mga indibidwal nga nakahimamat sa mga nahisgutan ingon man ang mga misalmot sa adlaw’ng misa.
Kalabot niini, subling nanawagan ang mga otoridad sa mga katawhan nga mitambong sa misa sugod kaniadtong bulan sa Desyembre 22 hangtod Enero 2 nga kung ugaling makasinati kini og sintomas makig-alayon gilayon sa ilang mga health workers aron malikayan nga mukuyap pa ang nahisgutan nga sakit.
Gumikan niini, mas gipahugtan pa sa ubang simbahan sa syudad ang ilang pagpatuman sa health protocols sama na lamang sa hugtanon nga pag scan sa mga QR Code sa usa ka indibidwal kung ugaling mupahigayon kini og misa ingon man ang pagbutang og hugasan sa kamot ug alcohols.
Kasamtangan, nagpadayon gihapon ang gipahigayon nga lockdown sa St. Francis of Asisi Parish gumikan sa mga natalang kaso.
