DAVAO CITY – Anaa na matud pa sa karon sa 28 porsyento sa mga Dabawenyos ang fully vaccinated sa kasamtangan, unom ka bulan sukad nga gisugdan ang Covid-19 vaccination sa siyudad.
Sa milabay nga Agosto 31 nga data sa Davao City Vaccination Cluster, anaa sa 329,203 ka mga indibidwal ang nakadawat ug duruha doses sa Covid-19 vaccine.
Sa nahisgutan nga ihap, 43,967 niini ang gikan sa Priority Group A1 (healthcare workers), 80,416 ang A2 (senior citizens), 112,928 ang A3 (persons with comorbidities), 84,587 ang A4 (essential workers), ug 7,305 ang sa A5 (poor population).
Anaa sab sa 590,318 ka mga indibidwal ang nakadawat sa ilang first dose. Subay sa breakdown, 57,159 ang A1, 87,037 (A2), 156,969 (A3), 254,447 (A4), ug 34,706 (A5).
Una ng gibutyag ni Covid-19 Task Force spokesperson Dr. Michelle Schlosser nga adunay 49 percent sa Dabawenyos ang bakunado na sa ilang first dose.
Samtang nagpadayon karon ang mobile vaccination sa City Mayor’s Office ug Sanguniang Panlungsod (SP) aron nga makatabang sa mga konsehal nga mapalapdan pa ang vaccination program, ilabi na sa mga geographically isolated ug disadvantaged areas (Gida).
Kahinumduman nga target sa lokal nga kagamhanan nga mabakunahan ang 1.2 million Dabawenyos ug first dose pagsulod sa bulan sa Nobyembre.
