Wala mitambong sa pagdungog sa House Quad Comm kagahapong adlawa si kanhi Pangulong Rodrigo Duterte gumikan kay gihisgutan na niini pag-ayo ang iyang nasayran sa extra judicial killings sa dihang mitambong kini sa pagdungog sa Senado.
Gipahayag ni House Majority Leader Manuel Dalipe, House Assistant Majority Leaders, Zambales Rep. Jay Khonghun ug La Union Rep. Paolo Ortega nga daw natalaw ang kanhi Pangulo nga atubangon ang pangutana sa mga miyembre sa Kamara ug pamilya sa mga biktima sa EJKs nga nangayo ug hustisya.
Dugang gipahayag ni Rep. Khonghun, kung gusto gayod sa kanhi Pangulo nga hatagan ug insaktong inpormasyon ang publiko mahitungod sa maduguong war on drugs sa Duterte administration, gikinahanglang mo-atubang kini sa QuadComm.
Gikinahanglang klaruhon sa kanhi Pangulo ang iyang gisulti nga giawhag niini ang mga pulis nga misukol ang suspek aron ma-justify niini ang pagpatay sa mga suspetsado.
Nagpadala ug sulat ang kampo ni Duterte pinaagi sa abogado niini nga si Atty. Martin Delgra III nga dili makatambong ang kanhi Pangulo.
Nasuko usab usab si Rep. Joseph Stephen Paduano sa sulat ni Delgra ug gikanayong naglikay lamang ang kanhi Pangulo sa pangutana sa mga magbabalaod.
Samtang tubag usab ni kanhi Pangulong Rodrigo Duterte nga wala matud pay angay nga mangasuko matud pa ang mga magbabalaod sa Quad Comm, gumikan wala na matud pay saysay og mutambong pa kini sa pagdungog sa Kamara, gumikan gibutyag na matud pa niini ang tanang gusto niining iistorya niadtong mitambong kini sa Senado.
