DAVAO CITY – Nagahinan og P12 million nga kantidad sa mga discount vouchers sa mga abono ang nasa dul-ang 1,500 ka mga mag-uuma alang sa 1,822 hectares sa humayan sa Sto. Tomas, Davao del Norte.
Sumala pa ni Department of Agriculture 11 technical director for operations Marila Corpuz, makabenipisyo kanila ang maong gidalit nga voucher alang sa pagpakusog sa ilang productivity ug income.
Nakadawat lang niini kadtong mga mag-uuma nga rehistrado sa Registry System for Basic Sectors in Agriculture sa ahensya.
Mamahimo nilang magamit ang mga FDVs nga nagkantidad og P6,600 matag ektarya, o hangtud P13,200 nga kantidad sa mga pataba sa yuta nga makalukop sa 2 ektaryas nga humayan.
Mamahimong magamit sa mga mag-uuma ang mga vouchers hangtud Abril 20 aron ilang maseguro ang bastante nga suplay sa mga fertilizers alang sa paglambo sa rice production sa ilang mga humayan.
Nagpasalamat si Davao del Norte Governor Edwin Jubahib ngadto sa DA 11 sa paghatag og dagkong suporta ug hinabang sa ilang mga mag-uuma.
Sulti ni Corpuz nga sa tanan-tanan, mokabat ngadto sa P30 milyones ka mga fertilizer vouchers ang ipang-apud-apud sa mga mag-uuma, alang sa 4,546 ka hektaryang humayan sa Davao del Norte.
Samtang laing 1,400 na pud ka mga mag-uuma ang gitunulan sa lokal nga kagamhanan og mga fertilizer vouchers sa lungsod sa Asuncion.
via || Bombo LJF
