DAVAO CITY – Gi-awhag sa Davao City Reproductive Health and Wellness Center (RHWC) ang mga mabdos nga mga babaye nga anaa sa ilang unang trimester nga mopailalom sa libreng human immunodeficiency virus (HIV) testing sa RHWC facilities aron nga masayran ang ilang status ug ma-protektahan ang ilang gisabak nga bata batok sa impeksiyon.
Sumala pa kang Eddie Batoon, community health outreach worker sa Aids Society of the Philippines–RHWC, mamahimo sumala pa nga matakdan ang gisabak nga bata sa inahan nga adunay HIV atol sa pagbuntis, childbirth, ug breastfeeding.
Kung positibo ang HIV ug mipailalom sa Anti-Retroviral Therapy (ART), makunhuran sumala pa ang tsansa sa mother-to-child transmission.
Apan gitino ni Batoon nga dili tanan inahan nga positibo sa HIV ang makatakod usab sa ilang anak gumikan kay anaa lamang sa 20 ngadto na sa 25 percent ang risgo o tsansa sa pagtakod sa HIV paingon sa bata depende sa level sa viral load o kadaghan sa virus nga naangkon sa usa ka inahan.
Gani mas moubos pa kini kung regular ang pagpatambal hangtud nga mamahimong luwas na ang gisabak nga bata sa inpeksiyon.
Gitataw sab sa nahisgutan nga kung ang virus hingpit na nga mitakod sa bata, mamahimong dili na kini mawagtang apan ang padayon nga pagtambal mamahimong makapalugway sa iyang kinabuhi.
Sukad tuig 2011 hangtud 2017, adunay 281 ka mga HIV positive pregnant women ang ilang natala.
