DAVAO CITY – Naglaom ang mga grupo sa mga lumad sa Davao Region nga lagdaan ni Pangulong Rodrigo Duterte ang kontrobersiyal nga Anti-Terror Bill dungan sa paghinumdom sa 31st anniversary sa Rano Massacre.
Sumala pa kang National Commission on Indigenous Peoples in Davao Region (NCIP-Davao) Director Gerry Aguio nga ang nahisgutan nga grupo sama sa Mindanao Indigenous Council of Elders and Leaders (Mipcel) ug Mindanao Indigenous People’s Youth Organization (Mipyo) ang nagpadayag sa ilang suporta sa Anti-Terror Bill o House Bill 6875 ingon man Senate Bill 1803 ug naghulat na lamang nga maaprubahan kini sa Pangulo.
Makatabang sumala pa kini aron nga malikayan ang pagpatay sa mga lumad susama sa nahitabo sa Rano Massacre kaniadtong tuig 1989.
Ang Rano Massacre mao ang nahitabong pagpatay sa 39 Bagobo Tagabawa tribesmen nga gihimo sa mga miyembro sa New People’s Army (NPA).
Kahinumduman nga mitambong kaniadto sa ilang Sunday morning worship ang mga lumad sa ilang simbahan sa Sitio Rano, Barangay Binaton, Digos City kaniadtong Hunyo 25, 1989, dihang kalit sila nga gi-atake sa mga rebeldeng NPA.
Dako ang pagtuo sa mga lumad nga mapabilin pa gihapon ang katungod sa sibilyan dungan sa hingpit nga pagpalabang sa Anti-Terror Bill isip balaod.
Nangandam na karon ang NCIP-Davao ug mga aktibidad alang sa paghinumdom sa 31st commemoration sa Rano Massacre.
Gitataw ni Aguio nga aduna sumala pay mga lapses sa kasamtangan nga polisiya nga kinahanglan hatagan ug kasulbaran.
