Kasagaran sa mga Pilipino, og magsaulog na sa kapaskohan pinaagig pagpahigayon og mga Christmas Party, dili gayud mawala ang usa sa labing gikahinamang panghitabo, diin mao kining ginatawag nga exchange gift kon magbayloay og regalo ngadto sa ilahang mga higala.
Pinaagi sa exchange gift, mahinumduman sa kadaghanang pilipino ang pagkamahinungdanon sa kapaskohan mao ang paghinatagay.
Sagad sab sa mga regalo nga ginalakip sa exchange gift, mao ang mga mamahalong butang, ang uban pa gani, dili na makontento ug sawayon pa ang ilahang nadawatang gift.
Apan, lahi kining nahitabo sa mga lumad sa Quezon, diin labing gikalipay niini sa dihang nag exchange gift na kini sila, atol sa ilahang gipahigayong Christmas Party.
Gani, bisan pa man og dili garboso ang ilahang gimugnang party, makita sa ilahang mga itsura ang hilabihang kalipay, gumikan nga inay mga mahalon o mga maanindot nga mga butang ang ilahang gipangsulod sa ilahang mga gift, mga kapayas lamang, talong ug hinarvest nga gulay nga gikan sa ilang gulayan ang ilahang gibalot isip christmas gift ngadto sa ilahang mga higala.
Matag grupo, adunay numerong nakabutang ug gibalot sa dahon sa saging, inay nga printed nga gift wrapper.
Makita sa ilahang mga mata, nga bisan tuod nga ultimo lamang ang sulod sa ilahang mga gasa alang sa pasko, malipayon gihapon kining midawat sa gasa nga ilahang nadawatan.
Ang maong panghitabo, maoy nagapahinumdum kanato nga ang Pasko dili lamang nagasimbolo sa kalibutanong butang, apan ang pagsaulog sa Pasko mao ang pagselebrar sa panaghigugmaay sa matag-usa diin maoy maghatag og tumang kalipay sa kinabuhi ug kalinaw alang sa tanan.
