DAVAO CITY – Anaa na karun sa kustodiya sa otoridad ang mga narekober nga mga eksplosibo human nga malampuson kini nga narekober sa mga sakop sa Alpha Company of 48IB ilalom sa 701 Brigade sa tabang sa usa ka kanhi rebelde nga mitudlo sa gikabutngan niini sa bukiron nga bahin sa Brgy Fuentes, Pantukan, Davao de Oro.
Dungan sa hugtanon nga intelligence operation sa 48th Infantry Battalion, narekober ang duruha ka Anti Personnel Mines nga sagad gamiton sa mga rebelde sa pagpamomba.
Tungod niini, gidayeg ni BGEN OLIVER C MAQUILING PA, 701st Brigade Commander ang gihimong pagpaningkamut sa kasundalohan diin dakung tabang kini arun nga dili mabutang sa risgo ang kinabuhi sa mga residente sa lugar.
Mapasalamaton sab ang nahisgutan sa kanhi rebelde nga si Alyas Bok nga maoy mihatag kanila ug impormasyon kung asa nahimutang ang mga eksplosibo.
Kahinumduman nga hugtanon nga gikondena sa kasundalohan ang kanunay nga paggamit ug landmine sa mga NPA gumikan kay mamahimong mapagan niini ang mga inosenteng sibilyan.
Ang mga Anti-Personnel Mines ang gidala karon sa Headquarters 48th Infantry Battalion aron masiguro nga malikayan ang disgrasya.
