DAVAO CITY – Aprubado na sa konseho ning siyudad ang ordinansa nga mohatag ug special incentive deal ngadto sa mga nanag-iya ug luna ingon man sa mga developers alang sa parking spaces sa siyudad.
Una ng gipaluyohan ni Konsehal Jimmy Dureza, chairman sa committee on trade, commerce and industry, nga tumong sa maong ordinansa nga ma-awhag ang mga nanag-iya ug propedad o developers nga momugna sa ilang mga propedad ug parking spaces nga mamahimong magamit sa publiko.
Mamahimong exempted na matud pa ang mga land owners ug developers sa pagbayad ug business taxes alang sa parking space sulod sa lima ka tuig.
Ang incentive package alang sa bag-ong gimugna nga mga parking areas sa open spaces ang gilangkuban sa duruha ka tuig nga exemption sa landowner sa pagbayad ug real property taxes.
Samtang sa mga bag-ong gitukod nga parking buildings, ang operator exempted sa pagbayad ug real property taxes sulod sa lima ka tuig.
Apan kalakip sa ordinansa nga kinahanglan mandato ang mga nanag-iya ug gambalay nga eklusibo lamang nga gamiton ang parking space sulod sa lima ka tuig ug dili mamahimo nga i-convert sa bisan unsa man nga katuyuan.
Angayan sab sumala pa nga ang gambalay adunay minimum nga duruha ka andanas.
Kahinumduman nga una ng mihangyo si Mayor Sara Duterte, atol sa iyang State of the City Address sa milabay nga tuig ngadto sa mga konsehal nga iduso ang paghatag ug incentives sa mga mitukod ug parking buildings ug kadtong mo-convert sa ilang mga luna ngadto sa parking spaces.
