DAVAO CITY – Nasakpan sa PDEA ug BJMP City Jail ang mga inmates nga nagpositibo sa paggamit sa illegal nga droga samtang narekober usab sa otoridad ang shabu sulod mismo sa maong pasilidad.
Gikabutyag ni Davao City Jail-Male Dormitory Warden JSupt. Peter Bongngat Jr., nga Oktubre 8 dihang duna siyay nadawat nga report hitungod sa usa ka bag-ong piniriso nga naghupot og shabu.
Gidudahang gitulon sa maong inmate ang kontrabando nga gipasulod sa bilanggoan. Sa gilusad nga surprise cell greyhound operation sa otoridad, narekober ang 12 ka sachet o kapin kon kulang 0.7 gramos sa shabu, drug paraphernalia, ug uban pang kontrabando nga nadiskubre.
Gibana banaang nikantidad og ₱10,000.00 ang street value sa nakuhang illegal nga droga.
Samtang gipailawom usab sa drug testing ang 44 ka PDL diin ang contrabando narekober ug nasuta nga 4 sa mga nahisgutan ang nagpositibo sa illegal nga droga.
Alayon niini palawman pa sa BJMP ang imbestigasyon sa maong hitabo alang sa tukmang kasong ipasang-at sa mga PDL nga nalambigit.
Gipasalig usab sa Davao City Jail nga mas pakusgon pa niini ang gipatumang security measures aron mapugngan ang mga kontrabando nga makasulod sa jail facility.
VIA || Bombo Mel Valledor
