DAVAO CITY – Gipa-andam na sab sa Davao City Water District (DCWD) ang mga konsumante gumikan sa gikatakda nga pagkawala sa supply sa tubig sa daku nga bahin sa Bangkal hangtud na sa Agdao, karong Pebrero 3, adlaw nga Sabado, hangtud Pebrero 4, adlaw nga Dominggo.
Kalakip sa ma-apektohan ang line one sa Dumoy Water Supply System. Mawad-an ug tubig sugod sa alas 9:00 sa buntag, ang pipila ka bahin sa Bangkal, tibuok Matina Aplaya, tibuok Ecoland Subdivision, Phase I hangtud XII, lakip na ang Juna Subdivision, Quimpo Boulevard ug SM Ecoland, ingon man ang tibuok Bucana, pipila ka area sa Barangay Langub, ug Down Town Area.
Samtang sa Agdao Area, apektado ang tibuopk Barrio Obrero, bahin sa Cabaguio Avenue, tibuok Cabaguio Avenue, tibuok Agdao kalakip na ang R. Castillo. Gilauman ang pagbalik sa supply sa tubig sa alas 9:00 sa buntag karong Dominggo.
Gitataw sa DCWD gumikan kini sa pagpahimutang ug bag-ong pipeline sa Tulip Drive kanto Gen. Mac Arthur Highway, Maa Road ug Kanto Mac Arthur Highway, ug Acacia St., sa Juna Subdivision kanto General Mac Arthur Highway. Kini isip pagpangandam sa Bulk Water Supply Project nga makompleto.
