Gipamahayag sa tigpamaba sa International Criminal Court (ICC) nga ang posibilidad sa interim release o temporaryong paggawas ug pagpauli sa Pilipinas ni kanhi Pangulong Rodrigo Duterte nagdepende sa desisyon sa gobyerno sa Pilipinas.
Sa usa ka paghinabi, gibutyag ni ICC spokesman Fadi El Abdallah nga kinahanglan una nga dawaton sa Pilipinas ang mga technical measures ug mga kondisyon aron makahukom ang mga ICC judges kung tugotan ba ang hangyo sa kanhi Pangulo alang sa interim release.
Gipaklaro sa opisyal sa ICC nga mahimong mangayo og interim release kung adunay mga klarong lagda ug kondisyon aron masiguro nga dili mahitabo ang mga posibleng peligro sa dihang ipagawas ang akusado, ug siya mopadayag sa korte kung ipatawag sa mga hukom.
Busa, kinahanglan una nga hisgutan ang mga kondisyon ug pangutana sa mga ICC judges sa wala pa sila makahukom kung tugotan ba ang interim release.
Samtang, gawas sa gobyerno sa Pilipinas, adunay kapilian ang kanhi Pangulo nga mopili og laing estado diin siya magpabilin samtang temporaryong nakabilnggo.
Sumala ni Abdallah, mahimo nga makighusay ang international tribunal pinaagi sa usa ka general agreement alang sa interim release sa laing estado, o di kaha, makasulod kini sa usa ka ad hoc agreement alang sa usa ka partikular nga kaso.
Sa maong sitwasyon, ang mga hukom magdesisyon sa technical measures ug kondisyon base sa kaso, ug kinahanglan kini dawaton sa usa ka estado aron ipagawas ang akusado.
Kung tugotan sa ICC ang espesyal nga mga kondisyon ug lakang nga gihan-ay, kinahanglan kini dawaton sa nasud nga modawat sa akusado aron masiguro nga dili kini mahimong hulga sa imbestigasyon, sa mga testigo, ug siya mopadayag sa korte kung ipatawag sa mga hukom.
