DAVAO CITY – Nagpahimangno ang Bureau of Fire Protection – Davao sa mga residente duol sa ground zero diin nahitabo ang sunog nga dili una mubalik sa ilang nasunog nga balay aron manguha og ubang mga gamit nga mamahimong mapahimuslan.
Gikanayon ni SFO4 Ramil Gillado, spokesperson sa Davao City Fire District, atol sa pakighinabi sa Bombo Radyo Davao, nga hulaton na lamang ang ipagawas nga abiso sa mga otoridad una pa man makasulod pagbalik sa ilang nasunog nga panimalay.
Dugang pa, basehan pa niini ang ilang pagahimoong overhauling ug clearing operations sa lugar aron masigurong layo sa bisan unsang peligro sama sa baga, bildo, bakal, live wire ug uban pang makasamad nga mga kabtangan.
Gikanayon sab ni Gillado, nga sagad hinungdan sa mga sunog dinhi sa dakbayan, pulos elektrikal sama na lamang sa electrical short circuit, octopus connection ug overheating sa mga kabtangan sa panimalay.
Kon mamamahimo, ipa-check ang mga linya sa kuryente sa usa ka eksperyensyadong electrician aron makunhuran ang potensyal nga kadaot nga masangko sa sunog.
Dugang pang pahimangno sa opisyal, mag-doble igmat ug ampingan ang mga kabtangan palayo sa pagpasagad sa paggamit niini.
Siguruhon sab nga dunay evacuation plan ang matag pamilya lakip na ang GO bag nga nag-unod ug mga essentials sama sa pagkaon, tubig, hygiene kits, kwarta, tambal ug uban pang mga dokumento.
Posible gihapong madungagan ang ihap sa mga sunog atol ug pagkahuman sa bulan sa Marso nga gideklarang Fire Prevention Month busa angay lamang nga ipaambit sa pamilya ug kasilinganan ang mga nahibal-an nga pamaagi aron maluwas sa sunog.
via || Bombo LJF
