DAVAO CITY – Mukabat sa kapin P3.97 million ang gipangapud-apud sa 75 ka mga kanhi rebelde sa probinsya sa Davao de Oro nga tiunay nang nibalik sa sabakan sa gobyerno.
Gipangunahan ni Davao de Oro Governor Dorothy Gonzaga ug 1001st Brigade Deputy Commander Colonel Gerry Besana uban ang mga managlahing ahensya sa gobyerno sa paghatag og mga benepisyo ngadto sa kanhing myembro sa NPA.
Gikan sa maong kantidad, mahatagan og tig P65,000 ang mga kanhi myembro sa NPA samtang P15,000 sab ang madawat sa mga kanhi myembro sa Milisyang Bayan nga makatabang sa ilang bag-ong kinabuhi.
Ang maong pagpanghatag, ilawom kana sa Enhanced Comprehensive Local Integration Program sa gobyerno diin 57 ka mga former rebels ug 18 ka mga kanhi Milisya ng Bayan ang nitahan kaniadtong 2021.
via || Bombo LJF
