DAVAO CITY – Dili na makadawat ug tabang gikan sa Lingap Para sa Mahirap program sa lokal nga kagamhanan sa dakbayan sa Dabaw ang mga sakop sa rebelding grupong New Peoples Army (NPA) lakip na kadtong mga tawo nga nanga-angol gumikan sa paghimo ug bisan unsa nga matang sa krimen.
Kini ang subay sa gilagdaang executive order no. 7 series of 2018 ni Davao city mayor Sara Duterte carpio penetsahan ug Marso 14, 2018.
Sumala pa sa mayor, kinahanglang amyendahan ang Section 3 sa Executive Order No. 35, series of 2016 o ang coverage sa Lingap para sa Mahirap Program aron mas mapalig-on pa ang pag-proseso sa programa ug aron usab masiguro ang ka-epesyente sa paghatud sa nag-una nga serbisyo niini ngadto sa mga kuwalipikadong residente sa dakbayan sa Dabaw.
Ang mga dili na makahimo sa pagpangayo ug tabang sa Lingap ang gilangkuban sa mga drivers o kaha pasahero nga nadisgrasya gumikan sa pagsupak sa balaud trapiko partikular na wala paggamit ug helmet; mga pasyente nga namapatud-ang sakop sa NPA kansa nasamdan atol sa engkwentro tali sa militar; mga drivers nga nadisgrasya gumikan sa kahubog; mga tawo nga nasamdan gumikan sa paghimo ug krimen, ug kadtong mga nanganak, gawas lamang sa ilang mga bag-ong gihimugso nga nagkinahanglan ug pag-atiman sa mga doktor.
Kahinumduman nga ang Lingap Para sa Mahirap Program ang gipatuman sa City Government of Davao aron mohatag ug medical ug funeral assistance ngadto sa mga kabus nga residente sa dakbayan sa Dabaw.
