DAVAO CITY – Nagpahayag sa iyang kadismaya si Retired P/Supt. Dionesio Abude sa kalit nga pagbaliktad ni SPO3 Arturo Lascañas diin gibarugan niini ang nahimong pahayag ni Self confess Davao Death Squad hitman nga si Edgar Matobato nga si kanhi Mayor ug kasamtangang Pangulo nga si Rodrigo Duterte ang mipaluyo sa mga nahitabong pagpamatay sa dakbayan.
Matud pa kang Abude nga nakurat siya sa nahimong lakang ni Lascañas ilabi na nga dungan pa sila nga nanumpa nga mosulti lamang ug kamatuoran atol sa ilang pagtestigo sa senado kalabot sa nahimong alegasyon ni Matobato diin pipila ka mga kapulisan sa siyudad ang giduhig sa gikanayong DDS.
Nasayran nga nahimong mentor kaniadto ni Abude si Lascañas sa heinous crime division sa DCPO.
Ulahi nga nadestino ni SPO3 Lascasñas sa Bunawan PNP ning dakbayan ayha hingpit nga miretiro kaniadtong milabay nga bulan sa Disyembbre.
Samtang sa pikas nga bahin, gipahimangnoan ni Senior Supt. Michael John Dubria ang director sa Davao City Police Office (DCPO) ang mga station commanders sa dakbayan nga dili magpa-apekto sa nahimong pagbaliktad ni Lascañas inay ipadayon lamang niini ang ilang mga trabaho.
