DAVAO CITY – Dungan sa nagkaduol nga kasaulogan sa kapaskohan ug bag-ong tuig, gipahimangnoan sa lokal nga kagamhanan ang mga miyembro sa Indigenous People (IP) o mga lumad nga dili na lamang mokanaug sa patag aron nga mamasko.
Sumala pa kang Davao City Mayor Inday Sara Duterte-Carpio nga sama sa milabay nga mga katuigan, mobisita na lamang ang mga personahe sa City Social Welfare and Development Office (CSWD) ug kini ang mohatag ug pinaskohan sa IP community sa siyudad.
Kahinumduman nga naandan na kaniadto sa mga lumad nga mokanaug sa patag aron nga mamasko apan gipugngan na kini sa siyudad gumikan kay adunay mga nagkasakit ug nadisgrasya.
Una na sab nga gibutyag ni Mayor Inday nga kadtong mokuha ug pinaskohan mamahimong dad-on lamang ang SafeDavao QR code.
Matag panahon usab sa kapaskohan, daghanan sab kaniadtong ang modagsa sa pinuy-anan ni Pangulong Rodrigo Duterte sa Bangkal apan nahunong kini sukad nga nahitabo ang outbreak sa Covid-19.
