DAVAO CITY – Misaka ang ihap sa insidente sa mga sunog dinhi sa Davao City karong tuiga.
Sumala sa pagbutyag ni SFO4 Ramil Gillado, ang tigpamaba sa Davao City Fire District, atol sa pakighinabi sa Bombo Radyo Davao, namatikdan ang pagkunsad sa ihap sa mga sunog gikan 446 ning nilabanyng tuig, niabot na karon sa 530 gikan Enero hangtod Oktubre ning tuiga.
Sumala pa sa opisyal, nisaka og 18.8% ang ihap sa sunog kon itandi kini sa susamang panahon sa nilabayng tuig. Sa maong ihap, 261 ang structural fires kon sunog nga sagad mahitabo sa mga kabalayan ug gambalay.
Samtang anaa sa 269 ang ihap sa mga non-structural fires o katong pag-ulbo sa kalayo sa natural nga mga rason sama sa wildfires.
Misaka sab ngadto sa P73 million ang gikatala nga kinatibuk-ang danyos sa sunog ug dunay natalang 7 ka mga casualties gikan sa maong insidente diin pinakaulahi niini ang usa ka babaye nga na-trap sa nasunog nga balay sa New Lanzona, Matina, Davao City niadtong Nobyembre 24 sa hapon.
Nagpabiling usa sa mga hinungdan sa mga sunog sa dakbayan ang sayop nga koneksyon sa kuryente, lakip na ang open fires diin nagadula-dula ug kalayo ang mga kabataan.
Nagpahinumdom ang Davao City Fire District ngadto sa katawhan karong panahon sa Pasko nga siguruhong luwas ang mga kabalayan pinaagi sa pagpili sa high quality nga mga Christmas light nga niagi sa product quality inspection ug dunay timailhan nga product quality sticker.
Sa pagkabit niini, kinahanglang sayron sab ang managlahi nga klase sa mga pasuga nga mamahimong ipasiga sa sulod ug gawas sa mga panimalay.
Gipapangandam sab ang matag pamilya sa ilang evacuation ug safety plan panahon sa pag-ulbo sa dagkong kalayo.
Maayo sab nga batasanon ang pagkasayod sa mga emergency contact numbers ug ang kahibalo sa pagpakgang sa kalayo sama sa paggamit og fire extinguisher.
via || Bombo LJF
