DAVAO – Gibutyag ni Herminigilda Escalante, tigpamaba sa Family Planning Organization of the Philippines-Davao (FPOP-Davao) ngadto sa Bombo Radyo Davao nga kinahanglan sutaon o sayron ang mga rason nganong ang usa ka indibidwal malambigit aning “sex work”. Matud pa niya, duha sa mga rason niini ang estado o pundasyon sa pamilya ug ang kapobrehon.
Dugang pa niya nga adunay importansya ang grassroots o pagpahigayon og mga symposium sa mga komunidad o tulanghaan aron mahatagan og pagtagad usab ang nagakataas nga kaso sa HIV sa dakbayan diin kasagaran sa mga nakasinati niini nga sakit, mga kalalakin-an nga anaa sa “productive age” gikan 25 hangtod 35 nga pangidaron.
Subay sa datos, nagpabilin ang dakbayan nga adunay taas nga kaso sa HIV (human immunodeficiency virus) sa Davao Region ug anaa na kini sa kapin libo nga kaso.
Kung kahinomdoman, niadtong 2022, mukabat sa 19,000 ka mga pasyente nga dunay HIV ang ilang nahimong target, ilabi na ang MSM cases alang sa screening, testing, diagnosis, ug treatment sa Davao region, sanglit 16,000 lamamg ang nakab-ot sa buhatan alang sa screen ug testing.
Ning kasamtangan, laraw pa sa buhatan nga ireach-out ang 3,000 nga gap nga kinahanglan ipailawom sa screening ug testing.
