DAVAO CITY – Subli nga gipahinumdoman ang mga ginikanan sa dakbayan nga mangandam na sa ipahigayon nga pagbakuna sa mga bata nga edad 5 anyos hangtud 11 anyos sa Pebrero 14 adlaw nga lunes sa mosunod nga semana.
Kahinumduman nga ipahigayon ang pilot sa vaccination roll out alang sa nahisgutan nga age group sa Southern Philippines Medical Center (SPMC) diin una ng gisugyot nga kinahanglan una kini manukad sa balay tambalanan ayha plano nga dad-on sa mga vaccination site.
Una ng gibutyag sa pamunoan sa Southern Philippines Medical Center (SPMC) pinaagi sa ilang hepe nga si Dr. Ricardo Audan nga sama sa mga roll out nga gipahigayon sa balay tambalanan, unahon una nila ang mga kabanay sa health care workers ilabi na ang mga nanarbahon sa SPMC kini aron masiguro nga mahatagan ug igong proteksiyon ang mga nahisgutan.
Sa higayon nga sugdan na ang roll out gitambagan ang mga ginikanan sa mga bata nga magdala ug mga gikinahanglan nga mga rekisitos sama sa ID niini ingon man birth certificate, baptismal certificate, school records, ug daghanan.
Una ng gibutyag sa ahensiya sa Department of Health (DOH) Davao nga kagahapon unta ipahigayon ang pagbakuna apan wala kini nahinayon gumikan kay wala sab dayon naabot ang mga bakuna nga gamiton dinhi sa siyudad.
Daghanang mga ginikanan sab ang naghulat sa roll out sa bakuna alang sa ilang mga anak aron nga maangkon na sab sa mga nahisgutan ang igong proteksiyon sa ilang kaugalingon.
