DAVAO CITY – Gipasabot karun ni DepEd-Davao spokesperson Jenielito Atillo nga dili na kalakip sa mga rekisitos ang waiver arun nga tugtan sa mga ginikanan ang ilang mga anak nga makabalik sa pag-eskuwela dungan sa subling pag-abli karon sa face-to-face (F2F) classes sa Davao Region.
Gitino ni Atillo nga wala sila nagmando sa mga ginikanan nga mulagda sa waiver form, inay pangayuon lamang nila ang pagtugot sa ginikanan arun nga makasalmut ang ilang mga anak sa in-person classes.
Gitataw sab niini nga ang mga tinun-an ang ipailalom sa assessment arun madetermina kung himsog kini ug physically fit nga makasalmut sa klase samtang kung ang bata usa ka masakiton o health-compromised dili kini tugtan nga makasalmut na sa klase bisan pa man nga aduna nay pagtugot gikan sa ilang ginikanan.
Dugang pa sa opisyal nga ang DepEd ug mga tulonghaan ang adunay responsibilidad arun lamang masiguro ang kaayohan ug kaluwasan sa mga bata ilabi na kung anaa na sila sa mga tulonghaan.
Nanawagan na lamang karun si Atillo ngadto sa mga ginikanan nga ipabilin nga himsog ang ilang mga anak ug luwas sa balatian samtang anaa gawas sa tulonghaan ug anaa sa panimalay ayha kini pasalmuton sa F2F classes.
Nasayran nga sa milabay nga Marso 14, anaa sa 82,683 learners ang gilauman nga misalmut sa F2F classes sa 293 nga mga tulonghaan lataw sa Davao Region dungan sa pag-ablo ug pagpadayon sa klase diin kalakip na niini ang 180 schools dinhi sa siyudad.
