DAVAO CITY – Gitambagan karon ang mga pasyente nga gikonsiderang F2 ug F3 nga mas maayo sumala pa nga mag-self monitor samtang nakasinate karon ang dakbayan ug kakulangon sa supply sa detection kits.
Kini ang gibutyag ni Dr. Michelle Schlosser, spokesperson sa Davao City COVID-19 Task Force gumikan kay padayon pa sab karon nga gikumpuno ang molecular laboratory extraction machine nga maoy mo-proseso sa swab specimens sa Southern Philippines Medical Center (SPMC).
Sa kasamtangan, gibantayan matud pa kadtong F1 o high-risk indibidwal ug mga pasyente nga adunay influenza-like illnesses (ILI) sanglit ang mga nahisgutan ang anaa sa taas nga risgo nga matakdan sa kagaw.
Sa higayon nga makasinate matud pa ang F2 ug F3 ug mga Covid-19-related symptoms, makonsidera ang mga nahisgutan isip high-risk individuals.
Sa kasamtangan, temporayo nga gilimitahan sa lokal nga kagamhanan ang Covid-19 reverse transcription polymerase chain reaction (RT-PCR) swab testing ngadto sa close contacts o F1.
Gikanayon ni Schlosser nga samtang gikumpuni pa ang SPMC molecular laboratory, i-proseso una ang mga specimens sa Los Amigos Molecular laboratory diin mamahimo kini nga maka-proseso ug 450 specimens matag adlaw nga mas ubos sa 1,500 specimens per day kung adunay kumbinasyon sa duruha ka mga molecular laboratories.
Gitambagan sab niini ang publiko nga laoman nga adunay dyutay nga pagkalangan sa swab results kini tungod pa gihapon sa pag-repair sa SPMC extraction machine.
Kahinumduman nga sa milabay nga Abril ning kasamtangan nga tuig, gi-isyu ni Mayor Sara Duterte-Carpio ang executive order (EO) o mandatory swab testing sa “tanan F1, F2, ug F3” contacts sa Covid-19-infected nga indibidwal diin ang ilang resulta kumpirmado sa reverse transcription-polymerase chain reaction (RT-PCR) test.
