DAVAO CITY – Gibutyag ni Davao City Mayor Inday Sara Duterte-Carpio nga mas daghanan na nga mga establisyemento ang mag-abli ilalom sa Modified General Community Quarantine (MGCQ).
Tungod niini, gi-awhag sa Mayor ang mga nanag-iya ug establisyemento nga ipatuman ang self-regulation aton nga malikayan ang pagkatag sa virus sama sa pagsuot ug face masks, social distancing, regular handwashing, ug pag-disinfect aron nga ma-proteksiyonan ang kaugalingon ilalom sa new normal.
Gitataw sab sa opisyal nga dili sa tanan panahon mamonitor sa lokal nga kagamhanan ang pagpatuman sa preventive measures 24/7 hinungdan nga kinahanglan mohimo ug lakang niini ang mga nanag-iya sa establisyemento.
Sa higayon nga dili motamud sa kamandoan, mamahimong pasirad-an ang negosyo ilabi na kung adunay empleyado nga magpositibo.
Samtang dungan sa pagpailalom sa siyudad sa MGCQ, pipila sa mga leisure ug entertainment establishments sama sa karaoke bars ang tugutan na apan kinahanglan nga mag-cater lamang kini ug hangtud 25% sa kapasidad sa venue uban ang istrikto nga pagpatuman sa health protection procedures sama sa pagsuot ug face masks ug disinfection.
Pabilin pa sab nga ipatuman ang 24-hour liquor ban ingon man ang curfew.
