DAVAO CITY – Kumpirmado nga mga iligal nga droga ang nasakmit sa gipahigayong operasyon sa usa ka resort sa Mabini, Davao de Oro niadtong weekend. Kini sumala sa Philippine Drug Enforcement Agency XI.
Gilangkuban sa shaby, tablets, capsules, ug liquid ecstasy, marijuana, ug LSD kon lysergic acid diethylamide.
Gikanayon sa Regional Director sa buhatan nga si Aileen Lovitos nga nakita usab ang uban pang mga ginadiling droga, gawas sa mga unang nasakmit nga mga droga, pinaagi sa tabang sa ilang package detection dogs.
Miabot sa kapin 1.5 million pesos ang kinatibuk-ang balor sa mga illegal nga droga nga nakumpiska gikan kang Revsan Ethelbert Papay Elizalde, 33 anyos nga taga-Catalunan Pequeño, kinsa target sa gikasang operasyon, ug sa mga kauban niini nga sila Eana Faye Marie Olea, Bryk Jiordan Archival, Kurk Bryan Tiubot, Paolo Guerero.
Nadakpan usab ang dose ka uban pang indibidwal nga sila Janlord Masong, Christopher Prudente, Jesus Ragas III, Giovanni Tabanao ug Jason Viduya nga naaktuhan pa nga nag-drug session.
Pasakaan og kasong paglapas sa RA 9165 kon Comprehensive Dangerous Drugs Act of 2002 ang mga dinakpan.
Sa pikas bahin, nagtambag si Lovitos ngadto sa mga ginikanan nga i-monitor gihapon ang ilang mga anak bisan pa man nga independent na sila, ug i-apil usab sa ilang pagpanubay ang mga higala ug kauban aron nga dili sila masangko sa dautang binuhatan.
