DAVAO CITY – Nanawagan ang Land Transportation Franchising and Regulatory Board (LTFRB) -11 sa mga Public Utility Vehicle (PUV) nga hangtud karong adlawa na lamang ang pagsumite sa mga buot mag–avail sa Service Constructing Program sa ahensiya.
Una ng gibutyag sa LTFRB-11 nga gipahugtan nila karon ang ilang mga pamaagi isip pagtamud sa gipagulang Executive order ni Davao City Mayor Inday Sara Duterte-Carpio diin dili una himuon ang face to face ang transaksiyon sa mga nagkadaiyang buhatan sa kagamhanan ilabi na nga nagpabilin pa gihapon hangtud karon ang bahad sa Covid-19 ug daghanang mga empleyado na sab sa gobyerno ang nangatakdan sa kagaw.
Sumala pa kang Nonito Llanos III, regional director sa LTFRB-11 gipakusgan na lamang nila karon ang ilang information education campaign pinaagi sa Facebook ug uban pang social media.
Gitataw sab sa opisyal nga ginatawagan na lamang nila karon ang ilang mga kliyente sa higayon nga aduna kini kulang sa ilang gisumite nga mga rekisitos.
Sa mga buot magsumite sa ilang mga form o dokumento, mamahimo sab nga ibilin na lamang kini sa mga box nga gipahutang sa gawas sa ilang buhatan.
