DAVAO CITY – Kasong kalapasan sa Republic Act 9165 kon Comprehensive Dangerous Drugs Act of 2002 ang duha ka mga construction workers nga nangadakpan sa gilusad nga anti-drug operation sa kapolisan sa San Pedro PNP.
Una nang naila ang mga dinakpan nga sila si Kenneth Bolandres Antaran, alyas Kenneth, baynte anyos ug nanimuyo sa Purok 75, Jacinto St., Barangay 21-B, ning dakbayan sa Davao, kauban ang lain pang construction worker nga usa ka Mark Capili Palma, alyas Macmac, traynta anyos, ulitawo ug residente sa Purok 8, Barangay 31-D, Roxas, Extension, ning dakbayan sa Davao.
Nangadakpan ang mga nahisgutan niining milabay nga adlaw sa Bonifacio Extension, Corner Quezon Boulevard, Barangay 31-D, ning dakbayan sa Davao human mitunol ang usa sa mga suspek, ug usa ka gamay nga pakete sa gituohan nga shabu bugti sa kinyentos ka pesos nga buy bust money hinongdan nga dali nga gipangdakop ang nahisgutan nga mga suspek.
Nasayran nga atol sa pagdakop kanila, ang usa ka alyas Kenneth nakamatikod nga pulis ang ilang gika-transaksyon hinongdan nga paspas kini nga miikyas ug midagan palayo sa dapit sa tinguha nga maka-ikyas.
Wala kini gi-swerete gumikan kay nadagma kini hinongdan nga nadakpan sa kapolisan nga migukod kaniya atol sa iyang pag-ikyas.
Nakuha sa iyang posisyon ang lain pang pito ka mga pinataas nga pakete sa shabu nga mikantidad sa dul-an singko mil ka pesos, diin dali sab kini nga gi-endorso sa San pedro Police Station.
Nagpabilin pa gihapon sa bilanggo-an sa San Pedro PNP ang mga dinakpan ug nag-atubang ug kasong paglapas sa Republic Act 9165 kon Comprehensive Dangerous Drugs Act of 2002.
