DAVAO CITY – Wala nahimong babag alang sa mga migradwar karong tuiga ang ulan ug baha nga nasinatian dinhi sa rehiyon sa Dabaw.
Ning miaging adlaw lamang, gibaha ang probinsya sa Davao Oriental ug Davao De Oro human ang walay hunong nga pag-ulan hatud sa habagat ug localized thunderstorms.
Una nang nag-viral ang nahitabo nga graduation ceremony sa mga college students sa Davao Oriental State University niadtong Hulyo 13 , diin asa gipahigayon ang ilang graduation rites sa may Baywalk, Mati City alas dos sa hapon, diin mikalit na lamang og bundak ang kusog nga ulan sa maong lugar.
Sa social media post ni Nisielgrace Ambasan, usa sa mga migradwar, makita nga bisag mibundak ang kusog nga ulan, wala kini panumbalinga ug nagpadayon gihapon sa pagtawag sa mga estudyante nga excited madawat ang ilang dugay na nga ginapaningkamutan nga diploma.
Sa pikas bahin, gawas sa Davao del Norte, gibaha usab ang pipila ka lugar sa Davao De Oro diin usa ka lalaki nga migradwar nga si Nestor Bryan Nuenay, migradwar sa kurso nga Financial Management, ang nakasinati og graduation samtang gabaha.
Bisan pa man, malipayon gihapon ang mga nahisgutan tungod nakatapos na sila sa kolehiyo.
Via || Hana Rallos
