Gipasabot ni Angelica Paña, Center Head sa Regional Rehabilitation Center for Youth (RRCY) sa Davao City nga ang Centers and Residential Care Facilities (CRCF) sa DSWD naghatag ug temporary shelter ug rehabilitation program alang sa mga kabatan-onan, senior citizens, ug ilabi na sa mga Children in Conflict with the Law (CICL).
Matod pa ni Paña, ang mga sintensya sa CICL gikan sa korte apan gisuspenso, ug gikinahanglan nga matunol ang rehabilitation process lakip ang medical requirements, referral pathways gikan sa LGUs, ug mga interventions sama sa psychosocial support, education ug skills training.
Sa kasamtangan, 85 ka CICLs ang anaa sa RRCY nga adunay bed capacity nga 90.
Apan, sa tibuok Davao Region, kapin na sa 130 ka CICLs ang natala, hinungdan nga nanginahanglan og dugang pasilidad ug manpower.
Giila usab nga congested na ang Bahay Pag-asa centers ug kulang ang mga social workers ug staff nga nagdumala.
Gibutyag usab nga ang RRCY adunay serbisyo sa edukasyon gikan elementarya hangtod Senior High School, diin 12 ka kabataan ang nakagradwar og SHS niadtong miaging tuig ug karon naga-enroll na sa kolehiyo.
Sa kinatibuk-an, mukabat sa 297 ka mga residente ang namuyo sa mga nahisgutang centers sukad Hunyo 2025. Ang mga programa sa CRCF naglakip sa Home Life Services, Social Service, Medical ug Psychological Care, Education, Skills Training, ug Spiritual Enrichment.
Gipunting ni Paña nga dili kini kulungan, apan usa ka rehabilitation center nga nagtan-aw sa potensyal sa kabataan nga makabawi ug makabalik sa komunidad isip mas responsableng indibidwal.
