DAVAO CITY – Patay ang tulo ka mga call center agents gikan sa dakbayan sa Davao samtang samdon ang lain pang unse ka mga biktima sa vehicular accident nga nahitabo sa Mambajao, Camiguin kagahapong adlawa.
Sa report sa kapolisan nawad-an ug preno ang puti nga Toyota Hi-Ace van nga dunay sakay nga mga local tourist, hinongdan nga misadsad sa karsada mga alas-4:45 sa hapon sa Sitio Quipasa, Barangay Poblacion, sumala pa kang Lieutenant Colonel Roy Bahian, Camiguin provincial police director.
Gumikan sa kakusog sa impact sa pagkasadsad, tulo ka mga pasahero ang gilayon nga nakabsan sa kinabuhi.
Grabeng mga samad sab ang nahi-aguman sa napulo ka lain pang uban, samtang minor injury lamang ang nahi-aguman ni Joy Sobremisana, driver sa van.
Subay sa inisyal nga imbestigasyon sa kapolisan, nawad-an ug preno ang sakyanan hinongdan nga nahulog sa bakilid.
Kadaghanan sa mga pasahero sa van mga empleyado sa IBEX Global Davao, nga miadto sa Camiguin alang sa ilang company team-building activity.
Samtang ang uban pa sa mga pasahero mga kabanay ug kapamilya sa mga worker sa call center company.
Naila ang mga nangamatay nga sila si Julie Ann Mae Olive, Jovert de Asis, ug Ian Jumahalili.
Ang mga nakalingkawas apan nakahi-agum ug grabe nga mga samad mao sila si Eric Opao, Jeffry Golingay, Ernesto Ong, Rose Ann Balaba, Jeffrey Dismas, Peter Anthony Cantila, Glyn Ann Sabacan, Jenny Vic Morensillo, Rustom Porosuelo, ug usa kwatro anyos nga bata.
