DAVAO CITY – Subling nagpahinumdom ang mga otoridad sa publiko nga interesado nga magpabakuna batok Covid-19, mamahimong muduol lamang sa inyong mga barangay officials aron makaparehistro ug maapil sa opisyal nga listahan sa vaccination program sa lokal nga kagamhanan sa dakbayan sa dabaw.
Angayan usab sumala pa nga moadto dayon sa vaccination site kung muabot na ang adlaw sa pagdawat sa bakuna.
Andam na ang mga vaccination site sa matag distrito alang sa pagsugod sa pagbakuna batok covid 19 dinhi sa dakbayan sa Dabaw.
Sa pakihinabi sa bombo radyo kang Dr. Josephine Villafuerte, ang head sa vaccination program sa dakbayan sa Dabaw nga gawas sa vaccination site, andam na usab ang master list sa mga prayuridad nga hatagan sa nahisgutang bakuna.
Labot niini, tambag ni Villafuerte sa mga magpabakuna nga relax lamang ug dili mahadlok sanglit kompleto ang syudad sa medical team nga sangkap sa kahibalo sa paghatag sa covid vaccine ug una tuplukan sa bakuna moagi una sa pipila ka mga proseso.
Hinuon, subling gitin-aw ni Villafuerte nga dili mandatory ang pagpabakuna. Apan walay laing nakita ang gobyerno nga pamaagi batok covid 19 kung dili ang pagpa-ilalom lamang sa maong prosesio.
Subay sa report, karong adlaw nga domingo moabot na sa nasud ang bakuna batok covid 19.
