DAVAO CITY – Giawhag sa BJMP 11 ang mga persons deprived of liberty kon PDLs nga musalmot sa ipahigayong pagbotar karong Barangay ug Sangguniang Kabataan Elections karong tuiga.
Gikanayon sa tigpamaba sa BJMP 11 nga si Capt. Edo Lobenia, gidasig nila ang mga binilanggo nga gamiton ang ilang right to suffrage kon katungod sa pagbotar tungod dili pa sila konnbikto sa gikalambigitang kaso.
Nakig-alayon sab sila sa COMELEC alang sa registration sa mga binilanggo alang sa BSKE. Wala nakatala ang ahensya og mga mudaganay alang sa BSKE gikan sa PDLs.
Nanghinaot sab ang BJMP alang sa malinawong pagpahigayon og piniliay sa mga selda sa rehiyon pag-abot sa a-30 sa Oktubre.
Kahinunduman nga giuyunan sa COMELEC ang desisyon sa Korte Suprema nga pabotaron ang mga PDLs human nga gi-lift ang temporary restraining order nga giisyu niadtong 2016 batok sa ilang pagbotar sa national and local polls alang sa mas inklusibong piniliay.
via || Bombo LJF
