DAVAO CITY – Gitambagan sa Securities and Exchange Commission kon SEC Davao ang mga biktima sa REPA scheme nga magpasang-at og kaso batok sa mga ginatawag nilang admin sa maong investment scam.
Sumala ni SEC-Davao Director Atty. Katrina Estares, ang korte lang ang dunay gahum nga makadesisyon kabahin sa mga nagareklamo nga buot mauli ang ilang gi-invest nga kwarta nga nangahanaw na tungod sa pagtangag sa mga nagapaluyo sa REPA.
Subling nagpasidaan ang buhatan ngadto sa publiko nga dili basta-basta magbutang og kwarta sa mga kwestyonableng investment schemes, ug kinahanglan usab nga pangitaan kini og secondary license nga gihatag sa SEC ayha muapil sa mga susamang programa.
Ginapanubayan na karon sa mga otoridad ang mga mulo sa mga nabiktima niini, human nga midagsang ang daghanang reklamante sa buhatan sa Davao City Anti-Scam Unit kagahapong adlawa.
Ang REPA scheme ang pinakabag-ong investment scheme, nga sama usab sa mga niaging investment schemes sa mga milabay nga tuig nga Rigen, Kapa, EverArm, Alammco, ug uban pa.
