Makita sa usa ka video ang natigayong kagubot sa sulod sa usa ka dakong tindahan sa Panabo City, Davao del Norte diin mikatag kini sa social media ug nakadani sa daghang mga netizen.
Ang maong footage, nga gi-upload sa netizen nga si Hoar Knee, nagpakita sa mga eksena sa kasamok diin nagnilabayay og mga botelya ug lingkuranan ang mga batan-ong nalambigit.
Sa video, makit-an nga dunay kasuko nga napuno sa kasaba ug kagubot. Apil sa maong insidente ang usa ka babaye nga nabiktima usab sa kalit nga pagpangbunal sa bangko gikan sa usa sa mga kalalakin-an nga giingong nakaaway kanila.
Nakadawat og reklamo gikan mismo sa tagdumala sa tindahan ang Panabo City Police Station (CPS) nga nagreport sa kadaut nga nahimo sa ilang mga kabtangan.
Ilang gitaho nga dili lamang kabtangan ang nadanyos apan aduna sab peligro sa kinabuhi ug kaluwasan sa ubang kustomer ang nabutang sa risgo niadtong mga orasa.
Gikumpirma sa kapulisan nga ilang gipatawag ug giimbestigahan na ang mga batan-ong gitumbok sa insidente ug posibleng mag-atubang og kasong kriminal ug bayronon sa mga kadaut.
Gi-awhag usab sa kapulisan ang publiko, ilabina ang mga kabatan-onan, nga magmatngon sa pagpugong sa kaugalingon ilabi na kung adunay alkohol nga nalambigit, ug likayan ang bisan unsang kalihukan nga makasamok sa publiko o makadaut sa kabtangan sa uban.
