DAVAO CITY – Gikanayon sa labaw sa Ancillary Services Office sa Davao City nga si Paul Bermejo atol sa pakighinabi sa Bombo Radyo Davao, nga ang pagtapun-og sa mga basura ang usa sa mga nag-unang hinungdan nganong masinatian sa Dakbayan ang halapad nga pagbaha sama sa nahitabo niadtong Lunes sa gabii.
Naobserbaran sa buhatan nga nagbara ang mga basura sa mga kanal ug agianan sa tubig, hinungdan nga dunay pipila ka dapit nga wala gihapon nahubsan sa baha kinaugmaan.
Sumala niya, sa mga panimalay nagasugod ang improper waste disposal, labi na sa barangay level.
Gibutyag usab niya nga nagapadayon ang clearing operations subay na usab sa kamanduan sa lokal nga panggamhanan.
Nanawagan usab si Bermejo ngadto sa katawhan nga buhaton ang ilang responsibilidad sa tukmang waste management aron nga dili mausab ang susamang dakong pagbaha niadtong Lunes sa mga umaabot nga panahon.
Mga pahayag ni Ancillary Services Office Head Paul Bermejo.
Kagabie subling nakasinate ug pagbaha ang pipila ka lugar sa dakbayan partikular na sa Bago Gallera, Mintal ug mga kasapaan nga sakop sa Lipadas river. Hinuon gilayon sab dayon kini nga nahubas dungan sa paghunong sa ulan. Pabilin sab nga okupado ang mga residente sa pagpanglimpiyo sa ilang panimalay human nga gisudlan ug lapok.
