DAVAO CITY – Gipasabot sa lokal nga kagamhanan nga ang mga COVID-19 vaccines nga anaa karon sa nasud ug nahatagan na ug emergency use authorization (EUA) ang napamatud-an nga luwas ug epektibo.
Dili na matud pa angayan nga pangutan-an ang kalidad sa mga bakuna gumikan kay susama matud pa kini nga mipailalom sa hugtanon nga pagtuon sa mga eksperto.
Una ng gipasabot sa Department of Health nga igo ang 50 percent efficacy rate alang sa anti-COVID jab hinungdan nga mas maayo sumala pa nga pahimuslan kung unsa man nga bakuna ang available karon sa dakbayan.
Kahinumduman nga ang mga bakuna nga anaa karon sa siyudad ang gilangkuban sa Chinese firm Sinovac, AstraZeneca, ug Pfizer.
Kahinumduman nga okupado karon ang dakbayan sa Davao sa vaccination program diin target ang 10,000 ka mga indibidwal nga mabakunahan aron nga daling maangkon ang herd immunity.
Una ng gibutyag ni Mayor Inday Sara nga laoman ang pag-abot sa daghanang bakuna sa mosunod nga mga bulan.
