Pangunahan nila Agatha Wong, Raph Trinidad, ug Rubilen Amit ang 47 ka atletang Pilipino nga mosalmot sa 12th World Games nga ipahigayon sa Chengdu, China sugod Agosto 7 hangtod 17 karong tuiga.
Ilado ang World Games isip kompetisyon sa mga sports nga wala sa Olympics, ug unang gihimo kaniadtong 1981.
Sukad niadto, nakadaog na ang Pilipinas og 2 ka gold medals, 5 ka silver, ug 5 ka bronze medals sa maong kalihokan.
Mikompirma si Philippine Olympic Committee President Abraham “Bambol” Tolentino nga kompiyansa silang mas daghang medalya ang makuha sa edisyong karon kumpara sa 2022 World Games sa Birmingham, diin usa ra ka gold medal ang nakuha pinaagi ni Junna Tsukii sa karate. Itudlo isip flag bearers sa Team Philippines atol sa opening ceremony sa Tianfu International Convention Center sila Wong ug Trinidad.
Si Agatha Wong, 27 anyos, kay lima ka beses nga SEA Games gold medalist ug adunay duha ka silver medal sa world championships.
Mosalmot siya sa women’s taolu taijiquan bare hands ug sword events, human siya makakuha og silver medal sa 2023 World Wushu Games sa Texas. Si Raph Trinidad, usa ka gold medalist sa IWWF Asia and Oceania Wakeboarding Championships, mosaulog sa iyang unang World Games.
Apil sab sa line-up sa Pilipinas ang mga iladong atleta nga sila Rubilen Amit, Jeffrey De Luna, ug Chezka Centeno sa billiards; Kayla Napolis ug Annie Ramirez sa jiu-jitsu; Hergie Bacyadan sa kickboxing; Rudzma Abubakar sa Muay Thai; Joyce Reboton ug Reggie Ramirez sa powerlifting; ug Aislinn Yap sa sambo.
Apil usab sa delegasyon ang 14 ka atleta sa floorball ug 12 ka paddlers sa dragon boat.
Gilauman nga makapadayon ang Pilipinas sa pagpangita og dungog ug medalya sa mga sport nga nagpakita sa kahanas, kusog, ug espiritu sa Pinoy athletes sa internasyonal stages.
