Nakadawat kuno ug pondo ang mga armadong grupo sa Mindanao sa gipalusot nga mga segarilyo nga kasagaran nagagikan sa Indonesia.
Kini ang gikumperma sa usa ka iladong security expert sa gipahigayong forum.
Gipahayag ni Prof. Rohan Gunaratna, usa ka security studies instructor sa Singapore’s Nanyang Technological University, partikular sa nahisgutang mga armado mao ang Abu Sayyaf Group ug Moro National Liberation Front.
Gipahayag pa niini nga ang mga nahisgutan mao ang nakabenepisyo sa gikita sa iligal nga negosyo sa sigarilyo sa southern Philippines.
Dugang pa ni Gunaratna, ang nasud Indonesia mao ang nag-unang kakuhaan sa mga sigarilyo nga mosulod sa nasud.
Gipahayag kini sa nahisgutang opisyal sa gipahigayong forum nga gi-uluhang “Terrorism-Illicit Trade Nexus: A National Security Threat” sa PROTECT 2024 Conference sa usa ka Hotel sa Makati.
Gihisgutan sa mga delegado sa forum ang padayon ug mipatigbabaw nga mga hulga nga gilangkuban usab sa mga kasamtangang geopolitical risks, violent extremism, climate change, cybersecurity ug uban pang disruptive technologies.
Nahilakip sa mga mitambong sa forum ang mga nag-unang defense officials susama kang National Security Adviser Eduardo M. Año ug Armed Forces Chief of Staff Gen. Romeo Brawner Jr., kauban ang pipila ka opisyal sa Indonesian Embassy sa Manila.
