Nasakpan sa sulod mismo sa usa ka public school sa dakbayan sa Tagum ang menor de edad nga estudyante sa Alternative Learning System (ALS) human makit-an sa iyang magtutudlo ang gituohang pinaugang dahon sa marijuana atol sa klase sayo sa buntag.
Matod sa impormasyon, personal nga gi-turn over sa maestra ngadto sa Tagum City Police Station ang iligal nga substansiya human kini makit-an sa estudyante nga nag-eskwela sa junior high level. Ang insidente nahitabo sulod sa campus sa Jose Tuason Jr. Memorial National High School, nga adunay regular nga presensya sa security personnel.
Sumala sa report, misulay pa ang batan-on nga malikay sa inspeksyon pinaagi sa paglukso sa pader sa eskwelahan, apan namatikdan dayon sa naka-assign nga Civil Security Unit personnel. Dili molungtad og dugay ang iyang pag-ikyas tungod kay napugngan siya sa maong guwardiya ug giatubang sa tukmang mga awtoridad.
Human sa insidente, gilayon nga gihatag ang menor de edad sa City Social Welfare and Development Office aron ipailalom sa hustong pag-atiman ug intervention program, subay sa balaod nga nagpanalipod sa mga kabatan-onan nga nalambigit sa sensitibong kaso.
Samtang nagpadayon ang imbestigasyon, nagpagawas usab og pahimangno ang Tagum City Police nga magpabiling alerto ang ginikanan, magtutudlo, ug komunidad, ug ipahibalo dayon ang bisan unsang kahimtang nga posibleng makadaot sa kaluwasan ug kaayohan sa kabatan-onan. Giila sa kapulisan nga dako ang papel sa eskwelahan ug pamilya sa pagpugong sa paglapad sa ilegal nga droga taliwala sa mga batan-on.
