Nagpadayon pa karon ang gihimong imbistigasyon sa kapulisan kabahin sa motibo sa pagpatay sa usa ka batan-on sulod sa sementeryo kagahapong adlawa.
Kahinumduman nga nagbuy-od na nga wala na’y kinabuhi human nga nakaplagan ang usa ka menor de edad sulod sa sementeryo sa dakabyan sa Mati Davao Oriental kagahpon sa buntag.
Subay sa report sa mga kapulisan, sayo sa buntag pasado alas 7:00, nakurat na lamang ang usa ka indibidwal sa iyahang pagbisita sa Public Cemetery sa Brgy. Sainz, Mati City, Davao Oriental nga nakita ang biktima nga wala nay kinabuhi.
Makita ang biktima nga anaa kini sa dalan taliwa sa mga lubnganan nga naka gapos ang mga kamot ug tiil gamit ang tiebox samtang giputos usab og cellophane ang ulo.
Sa gihimong pag-imbistiga sa mga otoridad, giila ang biktima nga si Jessie Olea alyas “Dodong”, menor de edad nga taga Dumping, Brgy. Matiao, Mati City, Davao Oriental.
Sa inisyal nga imbestigasyon sa Scene of the Crime Operatives (SOCO) adunay ginulgulan sa liog ang biktima nga maoy hinungdan sa iyang kamatayon.
Hustisya karon ang gipanawagan sa kabanay sa biktima.
Sa pagkakaron adunay mikatag nga post sa Social Media kabahin sa biktima kaniadtong nakalabay nga tuig diin nalambigit sumala pa pagpangawat.
Tungod niini, ginasubay na usab kini karon sa mga otoridad.
