DAVAO CITY – Daghan gihapon ang mga tawo nga gadagsang nga mga Dabawenyo sa Davao Memorial Park niadtong weekend.
Gumikan kini sa temporaryong pagpasirado sa mga lubnganan sa Dakbayan nga magsugod sunod Dominggo, Oktubre 24, ug mahuman sa Nobyembre 7.
Nagpagula na usab og pahimangno ang buhatan sa Davao City Police Office kon DCPO ngadto sa publiko nga duawon na ang ilang mga minatay sa dili pa manirado ang mga minteryo, o di kaha pagabuhaton kini sa Nobyembre 8, human sa temporary closure.
auman na sab ang huot nga trapiko sa mga dalan sa Dakbayan samtang nagaduol ang petsa sa pagpasirado sa mga ulahing kapahulayan, sama na lang sa nahitabo niadtong Sabado sa Davao Memorial Park.
Aduna usab presensya sa mga pulis sa mga lubnganan sa Dakbayan aron mapatuman ang huot nga seguridad ug mga minimum health protocol.
Kahinumduman nga gibuhat usab kini sa lokal nga panggamhanan niadtong milabayng tuig, kanus-a nahimong makaalarma ang surge sa COVID-19 cases sa Dakbayan.
Tumong niini nga malikayan ang mga panagtapok sa mga minteryo, ilabi na sa panahon sa Kalag-Kalag.
Nagpatuman usab og susamang mando ang Dakbayan sa Mati ug Lungsod sa Nabunturan karong tuiga alang usab sa nahisgutang tumong.
