Gitawag nga fake news sa Malacañang ang niguwa nga memorandum nga sumala pa gikan sa Office of the President ug pirmado ni Executive Secretary Lucas Bersamin, diin gibutyag nga gipalagpot kuno si House Speaker Martin Romualdez sa iyang pwesto.
Gipahayag nga ang rason sa maong memorandum mao ang pagkunhod sumala pa sa approval rating ni Pangulong Ferdinand Marcos Jr., busa kinahanglan pa palig-onon ang serbisyo ug ayuda sa katawhan.
Apan, matod ni Palace Press Officer Undersecretary Claire Castro, dili na angay nga hatagan og panahon ang maong balita tungod klaro nga kini gipakatag aron gubaon ang kredibilidad sa administrasyon ug sa pipila ka mga opisyal niini.
Nanawagan si Castro nga dili dayon motoo sa mga dokumento nga makita ilabi na sa social media, tungod kay nagkadaghan na ang mga palsipikado o pekeng dokumento karong panahuna.
Lakip sa mga mikatag nga memorandum nga naglakip sa post-meeting report kabahin sa sumala pa Laylo survey presentation niadtong Abril 8, 2025, nga giingong gitambongan ni Pangulong Marcos ug ubang opisyal sa gobyerno.
