Sa 17 kahigayon nagkasangka ang mga Filipino ug Mexican fighters sa usa ka world boxing championship, 14 ka mga pinoy ang midaug ug gusto ni world titlist Melvin Jerusalem nga mamahimong ika-kinse.
Dugay na nakong gihulat kini nga makalaban sa championship atubangan sa mga kababayan niini, matod pa ni Jerusalem sa pagdepensa niini sa gidalang World Boxing Council (WBC) minimumweight crown batok kang Mexican mandatory challenger nga si Luis Angel Castillo.
Magkasangka si Jerusalem ug Castillo sa Manny Pacquiao presents ‘Blow By Blow’ event karong adlaw nga dominggo sa Mandaluyong City College Gym.
Aron mosugot si Castillo nga adunay 21-0-1, win-loss-draw ug 13 knockouts nga makigsangka kang Jerusalem nga adunay 22-3-0 win-loss-draw ug 12 knockouts sa Pilipinas, gipatas-an ni Pacquiao ang prize money sa Mexican slugger.
Matod pa ni Jerusalem, sobra kadako ang impact alang sa iyaha nga makigsangka dinhi sa Pilipinas gumikan kay gipangandoy niini nga modepensa sa world championship dinhi sa Pilipinas.
Kini ang unang pagdepensa sa 30-anyos nga taga Manolo Fortich, Bukidnon sa gihuptan niining WBC minimumweight belt nga nadag-an niini homan gipildi si Japanese Yudai Shigeoka sa Nagoya niadtong Marso 31.
Ang 30-anyos nga si Jerusalem ang usa sa duha nga nahibiling Filipino reigning world champions gawas kang Pedro Taduran nga adunay gihuptang International Boxing Federation (IBF) minimumweight title.
Apan walay laing gustong mahitabo si Castillo ug kini mao ang pag-ilog kang Jerusalem sa korona niini ug madala sa Mexico.
Dugang gipahayag sa 27-anyos nga Mexican boxer gilauman niini nga mapahagsa si Jerusalem sa bisan unsang round.
