DAVAO CITY – Gi-inagurahan na ang mega crime laboratory sa rehiyon onse aron nga magamit sa mga imbestigasyon sa kapulisan sa Mindanao.
Ang upat ka andana nga gambalay gipundohan ug kinse milyones ka pesos gamit ang Countrywide Development Fund ni kanhi Senador Allan Peter Cayetano. Ang DNA testing facility mamahimong libre alang sa mga kasong criminal, sama sa lugos.
Abli sab kini alang sa praternal identification, apan duna na kini’y bayad. Gawas sa DNA testing facility, duna sab kini’y automated finger printing identification system nga magamit sab sa crime scene investigation ug ballistic identification system.
Dili na dad-on sa kaulohan ang mga bala ug armas nga makuha sa crime scene gumikan kay i-download na lamang ang mga sample nga tua sa kaulohan aron nga mamahimo na nga paspas ang proseso.
Duna sa’y morge ang crime lab, apan dili mamahimo nga ipabilin ug dugang ang mga patay nga ipailalum sa imbestigasyon gumikan kay wala pa kini’y freezer. Gipahimutang pa ang autopsy table.
