Daghang ginikanan ang dili kontento sa K-12 ug Senior High School program sumala pa ni Sen. Gatchalian. Gipadayag ni Senador Sherwin Gatchalian, nga maoy Chairperson sa Senate Committee on Basic Education, nga daghang ginikanan ang nagpamatuod nga dili kontento o “dissatisfied” sa K-12 ug Senior High School (SHS) program sa nasud.
Sa gihimong pagdungog sa Senate Committee, gibutyag ni Gatchalian nga ang nasangpit nga impormasyon gibase sa usa ka survey nga gihimo niadtong Marso ug gi-komisyon sa iyahang opisina. Subay sa survey, 42% sa mga gitubag ang dili kontento sa K-12, samtang 32% lamang ang kontento.Sa bahin sa Senior High School program, 40% sa mga respondent ang dili kontento, ug 32% ang kontento.
Matod ni Gatchalian, base sa resulta sa survey, makita nga wala kaayo gibati nga kapuslanan ang mga ginikanan sa kasamtangang basic education program sa Pilipinas.Tungod niini, iyahang gisuportahan ang plano sa Department of Education (DepEd) nga palig-onon ang Senior High School program aron mahimong mas epektibo ug mapuslanon alang sa mga estudyante.
